නැනෝ තාක්‍ෂණය ත‍්‍රීවිලයටත්

වර්ෂාව ඇදහැලෙන අවස්ථාවක ත‍්‍රීරෝද රථ ඇතුළු මෝටර් රථවල ඉදිරි වීදුරුවේ (වින්ඩ්ස්ක‍්‍රීනය) ජලය රැඳීම වළක්වන නැනෝ තාක්‍ෂණික විසඳුමක් ඉංජිනේරු උපාධිධාරී රඛිත බි‍්‍රටෝ විසින් හඳුන්වාදී තිබේ.

වර්ෂා කාලවලදී රිය අනතුරු බහුල වීමට එක් හේතුවක් වන්නේ රථයේ ඉදිරි වීදුරුවේ ජලය රැඳීම නිසා රියැදුරාට පැහැදිලි ලෙස ඉදිරිය නොපෙනීමයි. ජලය පිසදැමීමේ ස්වයංක‍්‍රීය උපකරණ තිබුණද බොහෝ විට ජලය වීදුරුව මත රඳා පැවැතීම නිසා රියැදුරෝ අපහසතාවට පත්වෙති.

‘‘නැනෝ තාක්‍ෂණයේ බොහෝ උදාහරණ සාමාන්‍ය ජීවිතයේදී අපට දැකගත හැකිවෙනවා. හොඳම උදාහරණය තමයි නෙලූම් කොළේ මත ජලය නොරැඳීම. ඊට හේතුව නෙලූම් කොළය මත කඩතොලූ තිබෙන ප‍්‍රමාණය ඉතා අඩු බවයි. සාමාන්‍යයෙන් මොටර් රථවල වින්ඩ්ස්ක‍්‍රීනයේ කඩතොලූ විශාල ප‍්‍රමාණයක් තියෙනවා. එම කඩතොලූ මත දූවිලි අංශු විශාල ප‍්‍රමාණයකට රැඳී සිටින්න පුළුවන්. එමෙන්ම වහින වෙලාවට පතිත වෙන ජල බින්දු සහ වාහනවල වින්ඩ්ස්ක‍්‍රීනය අතර ඇතිවන ඝර්ෂණය නිසා වීදුරුව මත වතුර රැඳෙනවා. මෙයට හොඳම විසඳුම නෙලූම් කොළය මත ජලය නොරැදීමේ සිද්ධාන්තය උපයෝගී කරගැනීමයි.

ඒ අනුව නැනෝ තාක්‍ෂණය යටතේ සිලිකන් ඩයොක්සයිඩ් මූලික අමුද්‍රව්‍ය ලෙස භාවිත කර එහි රසායනික හා භෞතික ගුණ වෙනස් කිරිම මගින් වීදුරුවේ ආලේපනය කරන දියරයක් නිපදවීමට මට හැකිවුණා. අධික වර්ෂාවකදී ජලය පිස දමන ස්වයංක‍්‍රීය උපකරණ නොමැතිව වුවද අපහසුවකින් තොරව ගමන් කිරීමට මෙමගින් හැකිවෙනවා. මෙය ඉතා අඩු මුදලකින් නිපදවා ගැනීමට හැකිවීම විශේෂත්වයක්. මෙහි තිබෙන අනෙක් වාසිය වන්නේ වින්ඩ්ස්ක‍්‍රීනය පිරිසිදු කිරීම සඳහා සබන් අවශ්‍ය නොවීමයි.

ජල වීදුරුවක් පමණක් මේ සඳහා ප‍්‍රමාණවත් වෙනවා. එමෙන්ම මම ත‍්‍රිරෝද රථවල ‘ටෙන්ට් එක’ සඳහා භාවිත කිරීමටත් මෙම දියරය අලේපනය තුළින් ත‍්‍රිරෝද රියෙහි ‘ටෙන්ට්’ එකෙහි ආයු කාලය වැඩි කරගැනීමටත් අවපැහැ ගැන්වීම අවම කරගැනීමටත් හැකිවෙනවා. මෙම නිර්මාණ දෙකම ත‍්‍රිරෝද හිමියන්ට මහත් රුකුලක් වේයැයි මා සිතනවා. ඉදිරියේදී මෙය ප‍්‍රවර්ධනය කර ජනතාවට වැඩ දායක යමක් කිරීම තමයි මගේ බලාපොරොත්තුව’’ යැයි රඛිත පැවැසුවේය.